Постојат алтернативи за дисциплинирање на деца без казнување. За почеток, важно е да не се заменува еден вид на казнување (т.е. удирање) со друг (т.е. викање и навредување). Дисциплинирањето треба да стане позитивен, а не казнувачки процес. Ова е дел од комуникацискиот однос меѓу возрасен и дете.
"Добрата" дисциплина – што на крајот на краиштата нужно се сведува на самодисциплина – се потпира на возрасни лица кои покажуваат и објаснуваат позитивно однесување; поставување на високи очекувања од волјата на детето – и реални очекувања за нивната развојна способност – да го постигнат посакуваното ниво на однесување, и наградување на нивните напори со пофалби, дружење и почитување.
Почнете со тоа што ќе посветите повеќе време на разговор и вистинско слушање на вашето дете: Децата и младите често не знаат како да ги искажат нивните проблеми. Кога разговарате со вашето дете и "навистина" внимавате на тоа што ви го кажува, со тоа им покажувате дека навистина се грижите за нив и ги почитувате. Тоа исто така им помага и да ги испитаат нивните чувства и им помага тие чувства да ги преточат во зборови. Ова помага во развојот на нивната самодоверба.
Постојано истакнувајте ги позитивните работи за вашето дете и не користете негативни зборови: Децата треба да знаат дека нивните родители ги прифаќаат и ги сакаат. Родителите може да придонесат за тоа децата да се чувствуваат позитивно за себеси според тоа што велат и како го велат тоа. Пофалба упатена кон детето, со изрази на поддршка и охрабрување, може да направи детето да чувствува поголема самодоверба и вредност. Освен тоа, на овој начин се дава добар пример за детето и може да има влијание врз начинот на кој детето се однесува со своите пријатели и другите луѓе.
Децата имаат потреба да знаат дека нивните родители ги сакаат без оглед на тоа како се однесуваат. Кога родителите се служат со негативни зборови, тие упатуваат на негативни однесувања, но децата понекогаш тоа го толкуваат дека родителот така мисли за нив. Ова може да направи да се чувствуваат лошо и безвредно. Важно е јасно да покажете дека вашата љубов е безусловна, дури и кога зборувате за лошо однесување.
Користете поинакви начини од удирање на вашето дете или прибегнување кон психолошко казнување: Начинот на кој родителите ги дисциплинираат нивните деца е чувствителна тема. Голем број на луѓе биле удирани како деца или нарекувани со навредливи имиња; проучувањата покажуваат дека некои родители и понатаму ги удираат нивните деца и ги нарекуваат со погрдни имиња кога ќе постапат неправилно. Не сакаме да мислиме негативно за нашите родители или начинот на кој ние самите сме биле воспитувани. Затоа понекогаш е тешко да се согледа и соочи со фактот дека удирање на дете или викање на него/неа со навредливи имиња е лошо родителство. Исто така, понекогаш е тешко да се согледа дека со удирање или користење на навреди праќаме порака дека е во ред да се решаваат проблеми со сила или агресија. Често ова се прави од лутина или фрустрација, и затоа што родителот не знае поинакви методи. Еве некои совети како да помогнете детето да се однесува правилно без да "заигра шлаканицата":
