СУГЕСТИИ ЗА ПАРЛАМЕНТАРНА АКЦИЈА

Интерпарламентарната унија и УНИЦЕФ изработија прирачник – ЕЛИМИНИРАЊЕ НА НАСИЛСТВОТО ВРЗ ДЕЦАТА (ELIMINATING VIOLENCE AGAINST CHILDREN – достапен е само на англиски јазик) – со цел да се поттикне активно и делотворно дејствување од страна на парламентите и парламентарците во целиот свет во однос на препораките од Истражувањето од Генералниот секретар на ОН за насилството врз децата. Еве некои активности што може да ги преземат парламентите за да се спречи насилство врз децата во училиштата:

Поставете прашања до владата за следново:

• Дали е позната застапеноста на насилството во училиштата? Дали ќе се изведе истражување во основните и средните училишта за определување на нивото на насилство што го доживуваат учениците?
• Какви статистички податоци постојат за случаи на насилство во училиштата?
• Дали се забранети СИТЕ форми на насилство врз децата во сите образовни институции, вклучувајќи и приватни и верски училишта?
• Како се следи и спроведува забраната за насилство во државните и приватните училишта?
• Дали училиштата се обврзани да имаат политика за спречување и реагирање на насилничко малтретирање ('bullying')?
• Дали учениците во сите училишта имаат на располагање лесно пристапни постапки за пријавување на насилство?
• Дали препознавањето и спречувањето на насилство се вградени во училишните наставни планови и образованието/обуката за наставниците?
• Дали постојат безбедни и доверливи механизми за пријавување на сексуална злоупотреба или малтретирање во училиштата?

Во рамките на парламентот:

• Поведете дебата насилството врз децата во училиштата, а препораките од Истражувањето од Генералниот секретар на ОН може да ви послужат како рамка за дискусија.
• Поведете парламентарна комисиска истрага за сите форми на насилство врз децата во училиштата, и повикајте ученици да сведочат.
• Поведете парламентарна истрага за степенот на суштинско учество на учениците во организирање и управување со училиштата, во што спаѓа и изработка на политики за дисциплина и спречување на насилство.
• Предложете дискусија на тркалезна маса со учество на службеници од образованието, претставници на родители, наставници и ученици, со цел да се расправа за начини на создавање на ненасилни училишни заедници.
  

Во вашиот изборен округ:

• Прашајте ја локалната администрација за образование во вашата општина какви мерки се преземаат за спречување на насилство врз децата во училиштата, вклучувајќи и насилство од наставници.
• Посетете основни и средни училишта и разговарајте насамо со групи на девојчиња и момчиња за нивните искуства со насилство во училиштето.
• Остварете средби со наставниците за да разговарате за нивните видувања за насилството во училиштата и делотворна превенција.
• Подигнете ја свеста за потребата децата да се заштитат од насилство во училиштата со тоа што ќе пишувате написи во локлни весници, ќе учествувате во прилози за радио и телевизиски емисии и ќе барате повратни реакции од ученици, родители и наставници.