СУГЕСТИИ ЗА МЕДИУМСКИ АКТИВНОСТИ:

Медиумските професионалци и особено новинарите треба да бидат најсилни застапници на човековите права и застапници на промени. Тие треба да дејствуваат како очи, уши и глас на јавноста, насочувајќи го вниманието на јавноста кон случаи на злоупотреба на моќ и повреди на човековите права. Преку својата работа тие може да ја поттикнат власта и граѓанските организации да воведат промени што ќе го подобрат квалитетот на животот на луѓето.

Тие се во добра положба да ги задржат правата на децата како тема на вестите, преку ревносно набљудување на заштитата на тие права и повикување на одговорност на оние што не ги исполнуваат нивните обврски кон децата.

Начинот на кој медиумите ги претставуваат, или дури и ги игнорираат децата, може да има влијание врз одлуките што се носат во нивно име, и начинот на кој општеството гледа на нив. Некои медиуми често ги прикажуваат децата само како неми 'жртви' или шармантни 'невини дечиња'. Со давање на можности на децата и младите сами да го кажат она што сакаат да го изразат – за нивните надежи и стравувања, нивните постигнувања, и влијанието од однесувањето на возрасните врз нивните животи – медиумските професионалци може да ја потсетат јавноста дека децата заслужуваат да бидат почитувани како човечки единки.

Еве некои активности што може да ги спроведат медиумите за да промовираат училишта без насилство:

• Насилното и асоцијалното однесување кај децата речиси без исклучок влече корени од насилство кај возрасните и ставовите кон нив. Дали во вашето медиумско известување се имплицира дека младите прекршители заслужуваат помалку права од другите луѓе?
• Одржувајте натпревари и конкурси за деца за идеи за спречување на насилството врз и помеѓу децата.
• Опфатете ги и децата и младите кога ќе барате мислења за локални и државни политики за справување со насилството во училиштата. Објавете ги нивните видувања, особено за социјалните, образовните или инфраструктурните проекти кои непосредно ги засегаат на краток рок. Поттикнете ги да ги изразуваат нивните мислења за плановите за иднината.
• Како училиштата се справуваат со 'палави' деца? Дали казните се правични или строги? Како училиштата се справуваат со насилничко малтретирање ('bullying')? Има ли проблем со насилство кон наставниците, и ако има кои се причините?
• Можете да бидете и едно од многуте локални претпријатија што даваат добротворна медиумска поддршка за кампањата Училишта без насилство.