Насилство – физичко и психолошко – помеѓу децата и врз децата се случува секојдневно во училиштата. Се случува помеѓу самите деца. Некои наставници и родители исто така посегнуваат по насилни методи – почесто вербални, но понекогаш и физички – за да ги дисциплинираат децата и да ги научат што е правилно, а што не.

Ефектите од насилството честопати се исти со причините за насилство. Во некои случаи, деца што доживувале насилство го прифаќаат како нешто нормално, и потоа го манифестираат истото однесување. Деца кои постојано се закачани, исмевани, насилно задевани и понижувани дома или на училиште често се чувствуваат отфрлени, прогонувани, безвредни, или немаат самодоверба. Ако на овие деца не им се даде соодветна поддршка во справувањето со овие чувства, тие може таквите чувства да ги "испразнат" на несоодветни начини – вклучувајќи и агресија, па дури и тешки форми на насилство.

Последиците од маѓепсаниот круг на насилство врз децата може да бидат долгорочни, и меѓу нив спаѓаат:

• проблеми со физичкото здравје, како што се промени во развојот на мозокот, повреди, модрици и скршеници.
•  тешкотии во односите со другите луѓе
• проблеми со учење – добро е познато дека "исплашени деца не учат"
• тешкотии во изразување на чувствата на начин разбирлив за другите луѓе.
• проблеми со емотивното здравје, како што се анксиозност, депресија, агресија, или дури и желба за самоубиства
• зголемена склоност кон опасни нешта како земање дроги или впуштање во сексуални односи на многу рана возраст.

Освен ова, насилството со себе носи и мошне сериозни економски трошоци по општеството, бидејќи ги намалува човечките капацитети и го компромитира општествениот развој. Помали се изгледите децата да имаат долгорочни проблеми поради насилството ако имаат родител или друг член на семејството кој прави тие да се чувствуваат безбедни и сакани, и ако имаат пријатели кои може да им дадат поддршка и не ги наведуваат на противзаконски или опасни работи како што е земање дроги.

ТРЕБА ДА ДЕЈСТВУВАМЕ СЕГА ЗА ДА ОСТВАРИМЕ ДОЛГОТРАЈНИ ПРОМЕНИ

Насилството во училиштата е проблем во секоја земја. Она што е важно е дека не треба да чекаме тоа да се случи за да реагираме. За да се стави крај на кругот на насилство, сите – училишниот персонал, наставниците, учениците, родителите и членовите на заедницата – треба да учествуваат.

Кога зборуваме за училишта без насилство, пристапот "однесување за учење", кој тековно се воведува со поддршка од УНИЦЕФ, не се фокусира на самото насилство. Пристапот се фокусира на поттикнување на спротивното од насилството – соживотот, или "сложно заедничко живеење", како што изразува шпанскиот збор "convivencia". Во рамките на овој веб-сајт тоа го претставуваме како создавање на безбедни училишта преку поттикнување на позитивна клима во училиштето.

Потребата од долготрајни промени повикува до СИТЕ да направат промени.

• Повикува на воведување на национална стратегија која дава приоритет на создавање на безбедни училишта преку поттикнување на позитивна училишна клима. Од искуствата во други европски земји знаеме дека одговарањето на насилството во училиштата со заострени контроли и санкции има слаби изгледи да го реши проблемот на долг рок.
• Повикува на промени во начините на кои училиштата се справуваат со насилството. Делотворни стратегии на ниво на училиште се оние кои се насочуваат кон создавање на култура на позитивно однесување. За ова потребно е да се применат разни стратегии во кои учествуваат сите членови на училишната заедница - директорите, наставниците, учениците и родителите – и кои се насочени кон спречување на насилство.
•  Повикува на промени во начините на кои наставниците раководат со секојдневните активности на час.
• Повикува на промени во начините на кои родителите ги дисциплинираат нивните деца и поактивно се ангажираат во училишниот живот.
• Повикува на промени во начините на кои самите деца се однесуваат и како реагираат на насилство.

Промената нема да се случи прекуноќ, но ако не се направи систематски осврт на овие прашања, насилството во училиштата ќе продолжи да ја нарушува добросостојбата на децата и училишниот успех на учениците, и со тоа на децата ќе им го оневозможи правото да учат во безбедна средина што ги заштитува.

Се надеваме дека оваа веб-страница ќе ви помогне во остварувањето на промената.