Подучување на децата на социјалните и емоционалните вештини што треба да ги научат за да ги контролираат нивните чувства и да се однесуваат просоцијално и ненасилно е интегрален дел од создавањето на училишта без насилство.
Децата ќе ги научат овие вештини и на формален начин (наставната програма што се предава), како и од широк спектар на можности во секојдневниот живот на училиштето каде децата учат преку примери ("наставната програма" што се прима).
За да се даде поддршка на училиштата во постигнување на овие цели, Бирото за развој на образованието со поддршка од УНИЦЕФ ја изработи Програмата за образование по животни вештини. Програмата ги учи децата да ги препознаат и да се справат со емоциите, да се грижат за другите, да донесуваат исправни одлуки, да се однесуваат на етички и одговорен начин, за развиваат позитивни односи и да избегнуваат негативни однесувања.
Забележано е дека програмите како што е Животни вештини даваат и други резултати освен намалување на насилството. Истражувањата за влијанието на слични програми во други земји потенцира дека програмите како што е Животни вештини: подобруваат редовно посетување на настава; намалуваат нарушувачко однесување; го подобруваат успехот во учењето (оценките); го намалуваат бројот на суспензии и истерувања; придонесуваат децата повеќе да го сакаат училиштето; и придонесуваат децата да се чувствуваат посамостојни, независни и да имаат поизразено чувство на припадност.
Наставните програми обработуваат пет наставни теми на различни нивоа, со активности прилагодени за возраста (одделенија I до III, IV до VI и VII до IX). Во нив се нуди развивање на вештини и однесувања за прифаќање, разбирање или воспримање, како и лично учество на ученикот во настани од секојдневниот живот.
